मुंबई ; राज्यातील विधानसभा निवडणूक २०२४ आणि नांदेड लोकसभा पोटनिवडणुकीसाठी मतदानाची तारीख २० नोव्हेंबर २०२४ निश्चित करण्यात आली आहे. राज्यातील २८८ विधानसभा मतदारसंघांसाठी आणि नांदेड लोकसभा पोटनिवडणुकीसाठी एकाच टप्प्यात मतदान होणार आहे. महाराष्ट्राचे मुख्य निवडणूक अधिकारी एस. चोक्कलिंगम यांनी राज्यातील सर्व मतदारांना मोठ्या संख्येने मतदान करण्याचे आवाहन केले आहे. 

मतदानाची वेळ: सकाळी ७:०० ते सायंकाळी ६:०० वाजेपर्यंत मतदानाची वेळ ठरविण्यात आली आहे.

मतदान केंद्रे: ९ कोटी ७० लाख २५ हजार ११९ मतदारांसाठी राज्यभरात १,००,४२७ मतदान केंद्रे उभारण्यात येणार आहेत.

संवेदनशील केंद्रांवर विशेष व्यवस्था: संवेदनशील आणि अतिसंवेदनशील मतदान केंद्रांवर केंद्रीय राखीव पोलीस दलाच्या (सीआरपीएफ) तुकड्या तैनात करण्यात आल्या आहेत. तसेच, प्रत्येक जिल्ह्यातील पोलीस प्रशासन देखील सतर्क ठेवण्यात आले आहे.

निवडणुकीसाठी निवडणूक आयोगाने आवश्यक सर्व तयारी पूर्ण केली असून, मतदान प्रक्रिया सुरळीतपणे पार पाडण्यासाठी विशेष अधिकारी, पोलीस कर्मचाऱ्यांची नियुक्ती करण्यात आली आहे. नांदेड लोकसभा मतदारसंघातील पोटनिवडणुकीसाठी मोठा उत्साह दिसून येत आहे. या मतदारसंघात विविध पक्षांनी उमेदवारांची घोषणा केली आहे, त्यामुळे ही निवडणूक चुरशीची ठरण्याची शक्यता आहे. पोटनिवडणूक ही राजकीय दृष्टिकोनातून महत्त्वाची ठरणार असून, स्थानिक तसेच राष्ट्रीय पातळीवरील पक्षांसाठी महत्त्वपूर्ण आहे.