मुंबई : महाराष्ट्र विधानसभा निवडणुकीच्या मतमोजणीत यंदा महायुतीने ऐतिहासिक कामगिरी केली असून, भाजपने अभूतपूर्व यश मिळवले आहे. २०१९ च्या विधानसभा निवडणुकीत मिळालेल्या यशालाही मागे टाकत, भाजपने यंदा एकट्या १२६ जागांवर आघाडी घेतली आहे.

महायुती २२० पेक्षा अधिक जागांवर विजयाच्या उंबरठ्यावर आहे. २०१९ मध्ये भाजपने १०५ जागांवर विजय मिळवला होता. मात्र यंदा जनतेने भरघोस पाठिंबा देत हा विक्रम मोडून काढला आहे.

दरम्यान, महायुतीच्या “एक है तो सेफ है आणि कटेंगे तो बटेंगे” या रणनीतीचा फळ महाराष्ट्रात स्पष्टपणे दिसून येत आहे. महाराष्ट्रातील मतदारांनी भाजपसह महायुतीच्या अन्य घटक पक्षांना कौल देत स्पष्ट बहुमत दिले आहे.

विशेष म्हणजे, महाविकास आघाडीतील अनेक दिग्गज नेते पिछाडीवर आहेत, तर दुसरीकडे महायुतीने राज्यात मॅजिक फिगर सहज ओलांडली आहे. पंतप्रधान नरेंद्र मोदी यांच्या नेतृत्वाखालील भाजपला महाराष्ट्रात २०१९ च्या मोदी लाटेपेक्षाही मोठा जनाधार मिळाल्याचे या निकालांवरून स्पष्ट झाले आहे.

निवडणूक निकालांवरील महत्त्वाचे ठळक मुद्दे:

• भाजप: १२६ जागांवर आघाडी
• महायुती: २२० पेक्षा अधिक जागांवर विजयाच्या उंबरठ्यावर
• महाविकास आघाडी: अनेक दिग्गज नेत्यांचा पराभव संभाव्य

भाजपच्या या विजयाने महाराष्ट्रातील राजकारणाला नवीन दिशा मिळाली असून, राज्यात मोदी लाटेचा प्रभाव अजूनही कायम असल्याचे सिद्ध झाले आहे.