मुंबई : NASA आणि SpaceX यांच्या अंतराळवीरांचे स्पेस क्रू-8 मिशन, जे इंटरनॅशनल स्पेस स्टेशनवर कार्यरत आहे, त्यांच्या परतीचे काम वादळामुळे पुढे ढकलण्यात आले आहे. अंतराळवीर सुनीता विल्यम्स आणि बुच विल्मोर हे गेल्या काही महिन्यांपासून इंटरनॅशनल स्पेस स्टेशनवर अडकून पडले आहेत, आणि त्यांना पृथ्वीवर परत आणण्यासाठी नियोजित असलेल्या या मोहिमेला विलंब झाला आहे.

स्पेस क्रू-8 मिशनच्या अंतराळवीरांच्या परतीच्या मोहिमेवर वादळाचा परिणाम झाला आहे. फ्लोरिडामध्ये आलेल्या भीषण वादळामुळे NASA आणि SpaceX ने त्यांच्या क्रू-8 मिशनच्या परतीचे काम बुधवारपर्यंत पुढे ढकलले आहे. NASA च्या तर्फे सांगण्यात आले आहे की ते परिस्थितीवर बारकाईने लक्ष ठेवत आहेत आणि हवामान सुधारल्यास क्रू-8 ची अनडॉक प्रक्रिया आज रात्री 9:05 (भारतीय वेळेनुसार उद्या सकाळी 6:35) सुरू करण्याचा प्रयत्न केला जाईल. हवामान खात्याच्या अंदाजानुसार, या आठवड्याच्या शेवटी हवामानात सुधारणा होण्याची शक्यता आहे, ज्यामुळे सुरक्षित परतीसाठी योग्य वेळ मिळू शकते.

स्पेस क्रू-8 मिशनमध्ये NASA चे अंतराळवीर मॅथ्यू डॉमिनिक, जीनेट एप्स, माइक बॅरेट, तसेच रशियाच्या रोसकॉसमॉसचे अलेक्झांडर ग्रेबेनकिन यांचा समावेश आहे. हे सर्व क्रू सदस्य सध्या इंटरनॅशनल स्पेस स्टेशनवर आहेत आणि त्यांनी त्यांचे दैनंदिन कामकाज सुरूच ठेवले आहे. अंतराळ स्टेशनवर व्यायाम, शारीरिक फिटनेस, आणि आवश्यक देखरेखीची कामे करत आहेत. त्यांच्या परतीच्या मिशनमध्ये होणाऱ्या या विलंबामुळे स्पेस क्रू-9 मिशनच्या सुरुवातीची वेळ देखील पुढे ढकलली जाणार आहे.